Сяргей Законнікаў

[p_dohva]

Я - беларус.

Спрадвеку мне належыць

Чароўны край бароў,

палёў,

крыніц

Ад тураўскіх муроў да Белавежы,

Ад Крэва і да полацкіх званіц.

Крывіч,

радзіміч,

дрыгавіч

у згодзе

Дапамаглі мне моцным верай стаць,

Каб прарастаў,

як колас,

у народзе,

Які ніхто не зможа растаптаць.

Каб моваю душа мая світала,

Каб стаў я варты матчынай зямлі,

Скарына,

Каліноўскі

і Купала

Свой горды дух і мне перадалі.

Я - беларус.

Я ведаю сягоння,

Як пракладаць да шчасця

вольны шлях.

Са мною неўміручая Пагоня

І бел-чырвона-белы родны Сцяг!